U shkarkua nga vetingu, Gjykata e Strasburgut rrëzon pretendimet e gjyqtares shqiptare

Gjykata Europiane e të Drejtave të Njeriut ka rrëzuar pretendimet e gjykatëses Altina Xhoxhaj, për shkarkim të parregullt nga detyra pas procesit të vetingut.

Gjykata e Strazburgut rrëzon pretendimet e ish-gjyqtares, pasi thotë që nuk ka asnjë shkelje të të drejtave të njeriut. Sipas njoftimit të Gjykatës, procedurat për shkarkim ishin të rregullta dhe shkarkimi i Xhoxhaj ishte proporcional.

Në arsyetimin e saj, Gjykata e Strasburgut thotë se në çështjen Xhoxhaj, kundër Shqipërisë nuk kishte shkelje të disa neneve që pretendonte gjyqtarja Xhoxhaj, si e drejta për proces të rregullt, pretendimi për parregullsi në procedura, e të tjerë.

Altina Xhoxhaj, ish-gjykatëse e Gjykatës Kushtetuese, u largua nga detyra në 3 maj 2018. Xhoxhaj ankimoi në Strasburg shkarkimin e saj me pretendimin si të pabazuar në ligj e prova.

Sipas KPK, Xhoxhaj nuk justifikoi dot pasurinë e saj. KPA gjithashtu mbështeti vendimin e organit të parë, duke e larguar atë nga drejtësia.