U varros me nderime ish zv.ministri i mbrojtjes, Agim Mehmeti

Dje ka ndërruar jetë në Zvicër dhe sot është varrosur me nderime në vendlindjen e tij në Botushë, ish zëvendësministri i mbrojtjes i Republikës së Kosovës, Agim Mehmeti

Sot në Gjakovë, në Pallatin e Kulturës “Asim Vokshi” është mbajtur mbledhje komemorative ku janë kryer homazhet për ish zëvendësministrin e parë të mbrojtjes në Qeverinë e Kosovës, Agim Mehmetin. Prej aty trupi i tij është varrosur në fshatin e lindjes, në Botushë.

Me rastin e vdekjes së ushtarakut të lartë dhe veprimtarit të dalluar, Familjes Mehmeti i kanë shprehur ngushëllime përfaqësuesit e lartë institucionalë nga Kosova dhe Shqipëria, ndërsa në emër të kryetares së Gjakovës, Mimoza Kusari-Lila nga ai është përshëndetur nënkryetari i Komunës, Ramadan Hoti.

Haki Demolli, ministër i Ministrisë së FSK-së rikujtoi kontributin e tij ushtarak dhe patriotik, që nga përballja dhe burgimi në vitet e tetëdhjeta, e deri tek përkushtimet e tija konkrete për themelimin e strukturës mbrojtëse dhe luftarake për një Kosovë të lirë, si dhe shtet të pavarur, duke e karakterizuar Agim Mehmetin si njeri të veçantë, me kontribut të veçantë për vendin e tij.

Në këtë komemoracion janë lexuar edhe telegrame të shumta nga ish veprimtarët dhe ushtarakët e lirisë, ndërkaq në emër të familjes për organizimin dhe pjesëmarrjen e lartë në këtë ceremoni mortore ka falënderuar Bajram Mehmeti, vëllai të ndjerit, Agimit.