Ukraina alarmon Perëndimin se po u mbarojnë armët

Sipas zyrtarëve ukrainas, armët e premtuara nga Perëndimi po vonojnë

Ukraina përsëriti për të disatën herë thirrjen drejtuar Perëndimit se ka nevojë për armë dhe se pa to nuk mund të përballojë ofensivën ruse dhe për një kohë shumë të gjatë.

Këshilltari i presidentit Zelensky, i cili është dhe drejtuesi i ekipit negociator ukrainas, shprehu shqetësimin për progresin e ngadaltë të transferimit të armëve nga Bashkimi Europian.

Përmes një postimi në Twitter, Mykhailo Podolyak, tregon se Ukraina nuk ka marrë armët që ka kërkuar nga BE-ja dhe ato duan shumë kohë që të mbërrijnë.

Të njëjtin shqetësim, sipas CNN, e kanë ngritur orët e fundit dhe zyrtarët amerikanë të sigurisë, të cilët i frikësohen idesë së Ukrainës po i mbarojnë armët.

Ndonëse SHBA ka nisur një dërgesë të konsiderueshme me municione, sidomos për artilerinë, zyrtari i sigurisë shprehet se dhe ato mund të ezaurohen brenda disa javësh.

Për këtë arsye, sekretari amerikan i Mbrojtjes, Lloyd Austin, dhe gjenerali Mark Milley po zhvillojnë biseda telefonike me homologët europianë për t’i inkurajuar ata të dërgojnë sa më shpejt të jetë e mundur armatime drejt Ukrainës.

 

---