UNDP garanton mbështetje për diasporën

Misioni i UNDP-së është një nga partnerët kryesor të Ministrisë së Diasporës në projektet që kjo ministri është duke i udhëhequr. UNDP premtoi mbështetje për diasporë

Misioni i UNDP-së në Kosovë do të vazhdojë ndihmën për Ministrinë e Diasporës në implementimin e Strategjisë për Diasporën dhe Mërgatën. Kështu ka deklaruar zëvendësdrejtoresha e UNDP-së në Kosovë, Alessandra Roccasalvo gjatë një takimi që ka zhvilluar me ministrin e Diasporës, Valon Murati.

Programi për Zhvillim i Kombeve të Bashkuara në Kosovë, siç u tha, është një nga partnerët kryesor të Ministrisë së Diasporës në projektet që kjo ministri është duke i udhëhequr.

UNDP, sipas njoftimit të MeD, ka qenë partner kryesor në përpilimin e Strategjisë për Diasporën dhe Mërgatën, hartimin e regjistrit të diasporës dhe mërgatës si dokumenti më i rëndësishëm i Ministrisë së Diasporës, në rrjetëzimin e bizneseve të diasporës, si dhe në shumë projekte të tjera.

“Kjo ndihmë do të vazhdojë edhe më tej, duke e ngritur nivelin e bashkëpunimit” ministri Murati, sipas të cilës, puna dhe bashkëpunimi në të ardhmen do të rritet.

“Ne kemi pas partneritet në shumë procese me UNDP-në, dhe marrë parasysh projektet dhe puna që na presin në të ardhmen, besojmë që ky partneritet të jetë në nivel edhe më të lartë”, tha ministri kosovar.

Roccasalvo, ndërkaq u shpreh mirënjohëse për bashkëpunimin e deritashëm me Ministrinë e Diasporës si dhe u pajtua që niveli i bashkëpunimit të rritet edhe në fusha tjera, në dobi të dy anëve, duke falënderuar Ministrin për gatishmërinë e shprehur për partneritet.

“Projektet të cilat u udhëheqim ne si UNDP të financuara nga ambasadat, përkatësisht qeveritë partnere në këtë rast atë të Finlandës, janë të bazuara me qëllim të implementimit të Strategjisë së Ministrisë, ashtu që të sigurohet një mirëqenie për qytetarët e Kosovës duke shfrytëzuar kapacitetin e diasporës kosovare. Për këtë, do ta keni gjithmonë derën hapur tek UNDP”, theksoi Roccasalvo.

Në fund, si ministri Murati ashtu edhe Roccasalvo u dakorduan që të vazhdojnë bisedat në nivelin punues në mënyrë që edhe projektet që nuk janë përfshirë deri tani në agjendën e vitit 2015, të përfshihen Brenda programit të UNDP-së, ashtu që të vazhdohet me partneritet në të gjitha fushat e përgjegjësisë së Ministrisë së Diasporës.