Ushqimin në “Berlinale” do ta përgatisë një refugjate siriane

Festivali kishte për temë refugjatët dhe imigrimin në vitin 2016, pasi Evropa u trondit nga ardhja e më shumë se një milion refugjatëve nga Lindja e Mesme dhe Afrika, përfshirë edhe vetë Jazmatin

Një refugjate siriane do të përgatisë ushqim për mysafirët VIP në hapjen e festivalit më të madh gjerman të filmit, “Berlinale”, muajin tjetër. Zgjedhja e Malakeh Jazmatit pasqyron misionin e festivalit, aktiviteti i të cilit filloi në vitin 1951 për të shfaqur filma që adresojnë çështjet urgjente sociale dhe politike në botë.

Festivali kishte për temë refugjatët dhe imigrimin në vitin 2016, pasi Evropa u trondit nga ardhja e më shumë se një milion refugjatëve nga Lindja e Mesme dhe Afrika, përfshirë edhe vetë Jazmatin.

Në festivalin e filmit të Berlinit që pritet të hapet në shkurt, kuzhinierja 30-vjeçare, e cila drejton një biznes në kryeqytetin gjerman me bashkëshortin e saj, do të gatuajë për më shumë se 400 mysafirë. Ajo do të punojë nën urdhrat e menaxherit të Berlinales, Martin Scharff dhe do të bashkëpunojë me kuzhinieren Barbara Massaad, e njohur për recetat e saj siriane.

“Njerëzit nuk kanë shumë informacione rreth specialiteteve tona. Megjithatë, besoj se ata do të shijojnë ushqime të mira”, tha Jazmati për Reuters.

Festivali do të hapet më 15 shkurt me premierën botërore të filmit të animuar “Isle of Dogs” të Wes Anderson, në të cilin aktrojnë Bill Murray, Scarlett Johansson dhe Tilda Swinton.