Vazhdon fluksi i madh në kufij, policia shton personelin

Sipas Policisë, në Pikëkalimin Kufitar Dheu i Bardhë në dalje ka kolona deri në 1 kilometër e gjysmë, dhe pritje deri në tri orë

Departamenti i Policisë Kufitare  ka shtuar personelin policor dhe ka aplikuar përshpejtim të kontrollit kufitar për të shmangur pritjet e gjata dhe të ju mundësojë qytetarëve kalim më të shpejtë të kontrollit kufitar.

“Me qëllim të njoftimit të qytetarëve dhe gjithë opinionit të gjerë, ju informojmë se në disa pikë-kalime kufitare që lidhin Republikën e Kosovës me atë të Serbisë , edhe sot ka pritje dhe kolona me intervale të ndryshme kohore, varësisht prej frekuentimit të automjeteve të qytetarëve të cilët po kthehen në shtetet e ndryshme të Evropës,” thuhet në njoftimin për medie të Policisë.

Derisa në Pikëkalimet Kufitare në Mutivodë, Jarinje e Bernjak qarkullimi i automjeteve po zhvillohet normalisht, pa pritje, në pikëkalimet tjera pritjet zgjasin deri në tri orë, shkruan express.

Sipas Policisë, në Pikëkalimin Kufitar Dheu i Bardhë në dalje ka kolona deri në 1 kilometër e gjysmë, dhe pritje deri në tri orë.

Në Pikëkalimin Kufitar në Merdare ka kolona deri në 900 metra, dhe pritjet janë deri në 1 orë e gjysmë.

Në Pikëkalimin Kufitar në Muqibabë ka më pak pritje dhe kolona është deri në 300 metra, kurse udhëtarët nuk presin më shumë se 25 minuta për të kaluar kufirin.