Vazhdon privatizimi në Kosovë

Për Valën 55 të privatizimit janë pranuar 65 oferta, dhe vlera e tërësishme e ofertave më të larta ishte 8.344. 213 euro. Kurse sipas AKP-së për shitjen përmes Likuidimit 14 gjithsej janë pranuar 51 oferta, dhe vlera e tërësishme e ofertave më të larta ishte 3.891. 187 euro.

Zëvendës drejtoresha menaxhuese e AKP-së, Mrika Tahiri, ka deklaruar se mbajtja e këtyre dy valëve të shitjeve në një ditë dhe pjesëmarrja në numër në rritje të ofertuesve është tregues se procesi i privatizimit të ndërmarrjeve shoqërore dhe i aseteve të tyre po vazhdon suksesshëm përpara, raportojnë mediat kosovare.

AKP-ja deri më tani ka përmbyllur 911 privatizime dhe kontratat tashmë janë nënshkruar, prej të cilave 651 kontrata janë nënshkruar nga privatizimi me metodën spin-off, ndërsa 234 kontrata janë nga shitjet e aseteve me likuidim.

Në fondet e mirëbesimit deri më tani janë grumbulluar rreth 590 milionë euro, ndërsa përfitimet e punëtorëve nga pjesa e 20 përqindëshit që u takojnë atyre kanë arritur shumën rreth 55 milionë euro.