Brenda gushtit, 238 persona kanë vdekur në Kosovë nga Covid

KEYSTONE/EPA/VALDRIN XHEMAJ

Numër i lartë i infektimeve, rritja e rasteve të vdekjes dhe mbingarkesa e spitaleve si pasojë e shfaqjes së variantit “Delta” të COVID-19 e karakterizuan muajin gusht të këtij viti në Kosovë, përcjell albinfo.ch.

Numri i infektimeve gjatë këtij muaji është regjistruar në shifrën rekord prej 36 mijë e 461 rastesh, që e bën muajin gusht si periudhën me më së shumti infektime që nga shfaqja e pandemisë COVID-19 në mesin e muajit mars të vitit të kaluar.

197 persona kanë humbur jetën si pasojë e COVID-19 vetëm gjatë periudhës 20 gusht deri më 31 gusht. Derisa brenda gushtit nga më shumë se 36 mijë të infektuar, u regjistruan 238 vdekje si pasojë e COVID-19.

Ekspertë të shëndetësisë thonë se vaksinimi i një pjese të madhe të personave në moshë të shtyrë ka parandaluar edhe rritjen e numrit të viktimave krahasuar me periudhat paraprake.

Gjatë muajit gusht është rritur edhe numri i testimeve. Instituti Kombëtar i Shëndetësisë Publike në Kosovë ka kryer 247 mijë e 175 testime për COVID-19 dhe raporti mes testimeve dhe rasteve të reja gjatë muajit gusht është 14.7 për qind pozitiv.

Aktualisht në Kosovë janë 26 mijë e 886 raste aktive, nga 539 sa ishin me një gusht. Ndërkaq të shëruar gjatë periudhës së muajit gusht janë regjistruar 10 mijë persona.