Vetëm në shtator, 300 mijë persona kaluan Morinën

Ndonëse lëvizja ka rënë për shkak të përfundimit të sezonit turistik, sipas Policisë së Kukësit, në shtator në pikëkalimin e Morinës kanë lëvizur rreth 300 mijë persona

Vetëm gjatë muajit shtator në kufijtë ndërmjet Kosovës dhe Shqipërisë kanë lëvizur rreth 300 mijë persona me mbi 100 mijë automjete. Kështu raporton Policia Kufitare e Shqipërisë, sipas të cilës, në kohë normale, lëvizja e njerëzve në Morinë sillet rreth shtatë mijë persona në ditë.

Ndonëse lëvizja ka ardhur duke u ulur, për shkak edhe të përfundimit të sezonit turistik, sipas zyrtarëve të Policisë së Kukësit, në muajin shtator në këtët pikëkalim kanë lëvizur rreth 300 mijë persona.

Mediet shqiptare raportojnë se 90 për qind e këtij fluksi ka lëvizur nëpër doganën e Morinit, ndërsa në pikat e tjera kufitare të të dy vendeve, lëvizja ka rënë dukshëm, ndërsa kontrolli bëhet vetëm me një sportel.

Zëdhënësi i Drejtorisë së Policisë së Qarkut të Kukësit, Jaho Çaushaj i ka thënë ATSH-së, se në muajin shtator kanë hyrë në Shqipëri nga Kosova 165 948 persona dhe 50 670 mjete të llojeve të ndryshme, ndërsa kanë dalë nga Shqipëria për në Kosovë 159 272 persona dhe 57545 mjete të llojeve të ndryshme.

“Është e ndjeshme rënia e fluksit të lëvizjes në krahasim me muajin gusht, kur  hynë në  Shqipëri 528 812 persona me 100157 mjete të llojeve të ndryshme, ndërsa dolën 454981 persona me 123617 mjete të llojeve të ndryshme”, tha Çaushi.  

Policia rrugore në të dy anët e Rrugës së Kombit vazhdon kontrollin e shtuar, me synim eliminimin e incidenteve të mundshme. Në të dy vendet kanë funksionuar gjashtë pikëkalime kufitar: Morinë, Shishtaveci, Borje, Orgjost, Qafë Prush dhe Tropojë.  

Ndryshe, me funksionalizimin e Rrugës së Kombit janë shtuar dukshëm lëvizjet nga Prishtina në drejtim të Tiranës dhe anasjelltas. Nga Prishtina në Tiranë tashmë mund të shkohet për tri orë e gjysmë, ndërsa nëpër rrugën e vjetër, është dashur 10 orë ose edhe më shumë.