Vetura hyn në turmë njerëzish në Melbourne, 16 të lënduar

Keystone

Dy njerëz janë arrestuar pasi një veturë ka hyrë në një turmë njerëzish në Melbourne të Australisë të enjten.

Disa njerëz janë lënduar, përfshirë së paku një fëmijë, kur vetura goditi qytetarët në rrugën “Flinders”, në orën 16:30 sipas kohës lokale atje.

Policia e Victorias ka thënë se është herët të dihet për motivin e rastit, por ka kërkuar qetësi dhe që dëshmitarët të lajmërohen për të pasqyruar rastin.

“Flinders” është një nga rrugët më të ngarkuara në Melbourne, pasi lidh stacionin e madh të trenit dhe qendrën e qytetit. Ky vend është i mbushur me tregtarë për Krishtlindje, transmeton Albinfo.ch.

Sipas raportimeve të para 14 njerëz janë dërguar në spitale, ndërsa dy të tjerë po trajtohen në vendin e ngjarjes. Sipas “CNN”, ka të lënduar rëndë.

Mësohet se shoferi po hynte në shpejtësi marramendëse në drejtim të turmës.