Vidhen 31 milionë dollarë të monedhave digjitale

Kompania prapa monedhës digjitale Tether ka njoftuar se afër 31 milionë dollarë vlerë të monedhave të veta janë vjedhur.

Kompania me bazë në Hong-Kong ka njoftuar se kishte marrë hapa për ndalje nga vjedhjet, por tani ka kërkuar nga përdoruesit të marrin një përditësim, shkruan BBC.

Ky njoftim vjen pas disa skandaleve të njëpasnjëshme së fundmi në tregun e monedhave digjitale.

Bitcoini pësoi rënie të vlerës menjëherë, por arriti të rikthehej, transmeton Albinfo.ch.

Për dallim nga shumica e monedhave digjitale, që funksionojnë ‘kundër’ dollarit, Tether është i lidhur ngushtë me monedhën amerikane.

Sipas operatorit të Tetherit, 30 milionë e 950 mijë dollarë ishte vlera e monedhave të larguara nga një prej “kuletave” më të pasura të kompanisë dhe ishin dërguar në një adresë të paautorizuar të Bitcoinit më 19 nëntor.

“Pas hetimeve të këtij sulmi po merren veprime parandaluese për ndonjë aksion të ngjashëm në të ardhmen”, ka thënë kompania në një njoftim.