Viktima më e re e koronavirusit vdes në Como, qytet në kufi me Zvicrën

Njoftohet se gruaja 62 vjeçe ka vdekur në një spital në qytetin Como, që është në afërsi të drejtpërdrejtë me kufirin me Zvicrën

Autoritetet italiane kanë njoftuar se në pasditen e të hënës ka ndërruar jetë personi i shtatë i infektuar nga koronavirusi. Bëhet fjalë për një grua 62 vjeçe nga Castiglione d`Adda, në Italinë  veriore, ka shkruar gazeta italiane “Corriere della Sera”.

Njoftohet se gruaja në fjalë ka vdekur në një spital në qytetin Como, që është në afërsi të drejtpërdrejtë me kufirin me Zvicrën, transmeton albinfo.ch. Kjo e bën rastin më të ndjeshëm për zviceranët dhe në veçanti qytetarët e Kantonit Tiçino, që kufizohet me Italinë dhe me qytetin Como.

Dy viktimat e tjera të ditës së sotme ishin dy të moshuar, 84 dhe 88 vjeç, derisa numri i të prekurve në Itali ka arritur në 230. Gjatë ditës është përgënjeshtruar rasti i raportuar dje , i vdekjes së një gruaje 84 vjeçe, të sëmurë nga kanceri, përc jell albinfo.ch. Autoritetet e spitalit kanë deklaruar se e ndjera nuk ka qenë e infektuar nga koronavirusi

Ndërkohë, numri i të vdekurve nga Koronavirusi në botë ka kaluar 2600-shin. Prej tyre vetëm në Kinë raportohen 2592.

---