Von der Leyen thotë se marrëveshja e normalizimit nënkupton njohje de facto të Kosovës

Presidentja e Komisionit Evropian, Ursula von der Leyen, po qëndron në Serbi në kuadër të turit të saj ballkanik.

Pas takimit që ka pasur me liderët e shtetit serb, ka shpjeguar se njohja de facto e Kosovës nënkupton implementimin e Aneksit të dakorduar në Ohër në mars sivjet.

“Për çfarë bëhet fjalë – për zbatimin e Marrëveshjes së Ohrit, që parasheh hapa të ndryshëm, përfshirë pranimin e dokumenteve dhe institucioneve të Kosovës nga Serbia, dhe shkon krahas themelimit të Asociacionit të komunave me shumicë serbe, të cilin duhet ta zbatojë Kosova”, ka thënë Von der Leyen në një konferencë për media të përbashkët me presidentin e Serbisë, Aleksandar Vuçiq, përcjell albinfo.ch.

Ndërkohë, Vuçiqi tha se “njohja e pavarësisë së Kosovës nuk është çështje për Serbinë” dhe se nuk i vjen turp ta përsërisë para presidentes së Komisionit Evropian.

“E dimë cilat janë obligimet tona nga dialogu dhe jemi të gatshëm t’i përmbushim”, ka thënë Vuçiq, përcjell albinfo.ch.