Votuesve nga diaspora që regjistrohen për votim me postë, u hiqet emri nga lista në vendvotime

Një procedurë e tillë ndiqet nga KQZ për tē eliminuar mundësinë e votimeve disa herë nga i njejti person

Derisa kanë mbetur edhe më pak se 12 orë për të aplikuar nga diaspora për regjistrim për zgjedhjet e 14 shkurtit, verifikimi i votuesve të regjistruar po vazhdon nga ana e KQZ-së përmes telefonit, raporton Albinfo.ch.

Ndërkohë që të gjithë aplikuesit që regjistrohen për të votuar përmes postës e humbin të drejtën që pastaj të vijnë për të votuar fizikisht në Kosovë më 14 shkurt.

Një procedurë e tillë ndiqet nga KQZ për tē eliminuar mundësinë e votimeve disa herë nga i njejti person.

Një gjë të tillë e konfirmon zëdhënësi i KQZ-së, Valmir Elezi.

“Atyre që u del emri që është regjistruar suksesshëm për të votuar përmes postës, emri i tyre largohet nga lista e votuesve që shpërndahet në vendvotime”, thekson Elezi.

Ndryshe, afati për t’u regjistruar për të votuar përmes postës ka nisur nga 13 janari dhe përfundon më 21 janar 2021 në orën 18:00, sipas kohës lokale në Kosovë.

---