Vuçiq: Nuk lejojmë të ketë Kosovë të pavarur

Të premten, Presidenti i Serbisë, Aleksandar Vuçiq, ka mbajtur takim me partinë e tij Progresiste Serbe në Pançevë, afër Beogradit.

Nga atje u shpreh se nuk do të lejojë që Kosova të jetë e pavarur. “Bëni çfarë të doni, jashtë dhe brenda, këtu në shtet, nuk do të lejoj që të shkatërrohet Serbia dhe nuk do të ketë Kosovë të pavarur”, ka thënë Vuçiq, shkruan Radio Evropa e Lirë.

Vuçiq ka thënë se ai nuk do të lejojë që qeverisja të ndryshohet me forcë, nën ndikimin e tjerëve, dhe as të zbatojë politika kundër interesave të Serbisë, përcjell albinfo.ch.

“Ata nuk do ta udhëheqin politikën e jashtme të Serbisë. Ata nuk do të vendosin për mua se kë ta sanksionoj, njerëzit do të vendosin, ata nuk do të vendosin për mua nëse Serbia do t’i bashkohet NATO-s, njerëzit do të vendosin”, ka thënë Vuçiq.

Marshi i partisë së tij në Pançevë është duke u mbajtur në kohën e njëjtë me protestën “Serbia kundër dhunës”, që po mbahet në Beograd.