Yvana Enzler përfundon misionin në Tiranë

Kryeministri i Shqipërisë, Sali Berisha priti sot, në një takim, ambasadoren e Zvicrës në Shqipëri, me rastin e përfundimit të detyrës

Ambasadorja zvicerane në Tiranë, Yvana Enzler përfundon misionin e saj diplomatik në Shqipëri.

Kryeministri i Shqipërisë, Sali Berisha priti sot, në një takim në Tiranë, ambasadoren e Zvicrës në Shqipëri, Yvana Enzler, me rastin e përfundimit të detyrës.

Kreu i Qeverisë së Shqipërisë i shprehu zonjës Enzler falënderimet për kontributin e saj në forcimin e marrëdhënieve dhe bashkëpunimit ekonomik midis dy vendeve, veçanërisht në fushën e energjisë, asistencën për zhvillimin e arsimit profesional, nxitjen e investimeve zvicerane në Shqipëri etj.. Në këtë kontekst, bashkëbiseduesit vlerësuan impaktin shumë pozitiv që gazsjellësi Trans-Adriatik (TAP) do të ketë edhe në zhvillimin e marrëdhënieve ekonomike dypalëshe, thuhet në një njoftim për media.

Zvicra me këtë rast ka marrë mirënjohje për ndihmën që i ka dhënë dhe vijon t’i japë Shqipërisë, në rrugën e saj të zhvillimit.

Berisha dhe Enzler pohuan nivelin shumë të mirë të marrëdhënieve midis dy vendeve dhe vullnetin e plotë të të dy qeverive për të zgjeruar e thelluar më tej bashkëpunimin dypalësh dhe për të intensifikuar përpjekjet për rritjen e investimeve me interes të ndërsjellë. 

Ambasadorja e deritanishme zvicerane ka shprehur kënaqësinë që pati rastin të shërbente në Shqipëri dhe falënderoi për mbështetjen që ajo ka pasur nga qeveria shqiptare, në ushtrimin e detyrës së saj. 

 “Enzler largohet nga Shqipëria si një mike e saj dhe është gjithnjë e mirëpritur këtu”, tha kryeministri i Shqipërisë, Sali Berisha.