Zëdhënësi i BE-së: Në Kosovë është krijuar situatë e rrezikshme

Bashkimi Evropian ka dënuar sulmin e ditës së diel në Banjskë të Zveçanit, ka thënë zëdhënësi i BE-së, Peter Stano, i cili ka deklaruar se situata duhet të depërshkallëzohet dhe përmes dialogut të gjendet një rrugëdalje nga krizat e vazhdueshme.

Stano në konferencën e sotme për media në Bruksel është shprehur se në Kosovë është krijuar një situatë shumë e rrezikshme, përcjell albinfo.ch.

“BE-ja është shumë e qartë, ne jemi ndërmjetës. Të dyja palët duan të anëtarësohen në Bashkimin Evropian dhe rruga e tyre është përmes dialogut. Ne nuk duhet të merremi me kriza të rrezikshme siç kemi tani, por duhet t’i ndihmojmë ata. Të gjitha këto janë thënë shumë qartë në njoftimin e anëtarëve të BE-së se si duhet të sillen për të hyrë në BE”, ka thënë ai.

Zëdhënësi i Bashkimit Evropian nuk ka treguar nëse BE-ja do të vendosë masa ndëshkuese edhe për Serbinë.

“Masat e vendosura për Kosovën nuk janë sanksione, kemi thënë që në fillim se BE-ja e ka pasur të qartë se masat janë të përkohshme, nëse BE-ja gjen arsye, do t’i prezantojë edhe Serbisë”, ka thënë ai.

Sa i përket takimit të radhës në kuadër të dialogut Kosovë-Serbi, ai ka deklaruar se palët do të ftohen kur të jetë e përshtatshme.