Zëvendëskëshilltari amerikan për siguri kombëtare, me kërkesa për Kurtin e Vuçiqin

Jon Finer, USA

Zëvendëskëshilltari amerikan për Siguri Kombëtare, Jon Finer, ka diskutuar me kryeministrin e Kosovës, Albin Kurti dhe me presidentin e Serbisë, Alesandar Vuçiq, për situatën në Veri të Kosovës.

Kurtit i është kërkuar që kryetarët e rinj t’i kryejnë detyrat në lokacione alternative dhe që forcat policore të tërhiqen nga ndërtesat komunale, shkruan Radio Evropa e Lirë.

Tutje bëhet e ditur se Finer e ka mirëpritur gatishmërinë e Kurtit që të punohet drejt krijimit të kushteve për zgjedhje të reja.

Vuçiqit, i është kërkuar që t’i tërheqë forcat e armatosura nga zona afër kufirit dhe të ulë nivelin e gatishmërisë ushtarake, si dhe të kërkojë nga protestuesit që të jenë të qetë, përcjell albinfo.ch.

Në dy komunikata për media, të lëshuara nga Shtëpia e Bardhë, është përmendur se Finer u ka kërkuar Kurtit dhe Vuçiqit që të riangazhohen në dialogun e ndërmjetësuar nga Bashkimin Evropian, si dhe të zbatojnë plotësisht Marrëveshjen për normalizim të marrëdhënieve, shkruan REL.