Zgjatet afati për hyrjen në Kroaci

Qeveria e Kroacisë ka njoftuar Prishtinën zyrtare se ka marrë vendim, që të zgjatet afati për hyrjen në territorin e Kroacisë për kosovarët që posedojnë viza Schengen

Të gjithë qytetarët e Kosovës që posedojnë viza ‘Shengen” mund ta shfrytëzojnë  edhe më tej territorin e Kroacisë pa pasur nevojë të pajisen me vizën kroate. Këtë vendim e ka marrë Qeveria e Republikës së Kroacisë, pas një kërkese që ka bërë Prishtina zyrtare.

Sipas një njoftimi lëshuar të mërkurën, Qeveria në Zagreb ka njoftuar Qeverinë e Kosovës se është marrë vendim që të zgjatet afatit për hyrjen në territorin e Kroacisë, të qytetarëve të Kosovës që posedojnë vizë Schengen.

“Sipas këtij vendimi, qytetarëve të Republikës së Kosovës që posedojnë vizë Schengen me dy ose më shumë hyrje si dhe për qytetarët e Kosovës që kanë leje qëndrimi në ndonjërin vend të Schengen-it nuk do t’u kërkohet vizë për të hyrë në territorin e Republikës së Kroacisë”, thuhet në njoftim.

Ky vendim, siç thuhet në njoftimin e Ministrisë së jashtme në Prishtinë, ka ardhur pas kërkesës që ka bërë ministri i Punëve të Jashtme i Republikës së Kosovës, Enver Hoxhaj.

“Viteve të fundit është fuqizuar bashkëpunimi dhe shkëmbimet e gjithanshme ndërmjet Republikës së Kosovës me Republikën e Kroacisë”, thuhet në njoftim.