Zgjatet marrëveshja e bashkëpunimit Suedi-Kosovë

Sipas MPJ-së së Kosovës, bashkëpunimi do të koncentrohet në tre sektorë kryesor, në mjedis dhe klimë, në arsim dhe në qeverisje demokratike dhe të drejtat e njeriut

Ministri kosovar i Punëve të Jashtme, Enver Hoxhaj dhe përfaqësuesi i Agjencisë Suedeze për Bashkëpunim Zhvillimor Ndërkombëtar (Sida) Ingrid Johansson, kanë ripërtërirë marrëveshjen e bashkëpunim zhvillimor ndërmjet Qeverisë së Suedisë dhe Qeverisë së Kosovës deri në fund të viti të ardhshëm .

Sipas një njoftimi lëshuar nga MPJ, Suedia dhe Republika e Kosovës, në nëntor të vitit 2009, kanë lidhur Marrëveshjen për Bashkëpunim Zhvillimor për periudhën 2009-2012, ndërsa me nënshkrimin e fundit ndërmjet dy qeverive është zgjatur deri më 31 dhjetor 2013.

Sipas kësaj Marrëveshjeje, Suedia do të ofrojë mbështetje financiare për bashkëpunimin zhvillimor ndërmjet Republikës së Kosovës dhe Suedisë gjatë periudhës deri në fund të vitit 2013.

“Objektivi i bashkëpunimit zhvillimor ndërmjet Republikës së Kosovës dhe Suedisë është që të kontribuohet në integrimin e Kosovës në BE, në zhvillimin ekonomik dhe stabilitet.

Bashkëpunimi do të koncentrohet në tre sektorë kryesor, në mjedis dhe klimë, në arsim dhe në qeverisje demokratike dhe të drejtat e njeriut”, thuhet në njoftimin e MPJ-së.