Zgjedhja e Thaçit president, dërgohet në Gjykatë Kushtetuese

Opozita kërkesën e vet e mbështetë në rastin e ish presidentit Behgjet Pacolli, të cilin e rrëzoi Gjykata Kushtetuese, 30 ditë pas zgjedhjes për mungesë kuorumi

Tri partitë opozitare në Kosovë, lëvizja Vetëvendosje, Aleanca për Ardhmërinë e Kosovës dhe Nisma, e kanë dorëzuar sot në Gjykatën Kushtetuese një ankesë që konteston mënyrën se si u zgjodh president Hashim Thaçi. Sipas opozitës, zgjedhja e Thaçit president i Kosovës bije ndesh me parimet kushtetuese.

Opozita kërkesën e vet e mbështetë në rastin e ish presidentit Behgjet Pacolli, të cilin e rrëzoi Gjykata Kushtetuese, 30 ditë pas zgjedhjes për mungesë kuorumi.

Edhe pse opozita shpesh nuk kanë qenë e kënaqur me vendimet e kësaj Gjykate, nënkryetarja e Kuvendit të Kosovës nga radhët e Vetëvendosjes, Aida Dërguti tha se “kësaj here po duan ta testojnë atë dhe ta ndjekin deri në fund rrugën institucionale, krahas protestave”.

“Ne mendojmë se zgjedhja e Thaçit ka qenë jo legjitime dhe është përcjellë me parregullsi. Prandaj sot tre përfaqësuesit e opozitës e dorëzojnë këtë kërkesë në Gjykatën Kushtetuese dhe të shohim cila do të jetë përgjigjja e tyre. Ne e kemi parë shumë përgjigje nga kjo Gjykatë dhe shumë herë jemi ndarë të pakënaqur”, tha ajo.

Dërguti nuk dha shumë shpjegime se ku bazohet kërkesa, duke përmendur vetëm disa: mungesën e 120 deputetëve në sallë dhe pauzat e shpeshta gjatë votimit.

Ndërsa Bali Muharremaj nga Aleanca për Ardhmërinë e Kosovës, tha se presidenti i zgjedhur, nuk është person unifikues dhe se zgjedhja e tij, është bërë nën masa represive.

”Ka qenë nën masat represive. Nuk ka ndodhur asnjëherë, që deputetët e Parlamentit të Kosovës të nxirren zvarrë. Unë nuk e di si ka mundësi një njeri të zgjidhet president, kur deputetët e Parlamentit të Kosovës, që mbrojnë interesin e qytetarëve, të nxirren zvarrë përjashta”, tha Muharremaj.

Edhe Enver Hoti, nga Nisma për Kosovën, u shpreh i bindur se nëse vlerësohet përmbajtja e kësaj lënde, ata do të dalin fitues në këtë rast. “Jemi të bindur se nëse vlerësohet përmbajtja e kësaj lënde, nuk vlerësohen emrat e përveçëm mendojmë se presidenti, do ta ketë fatin e presidentëve tjerë”, tha ai.

Opozita në këtë rast lidhet me rastin “Pacolli” ku Gjykata Kushtetuese kishte rrëzuar, në mungesë kuorumi. Në rastin e Hashim Thaçit, kuorumi ka qenë, 82 deputetë, por ata që janë larguar nga kanë pasur leje nga kryeparlamentari Kadri Veseli.

Ndërsa vetë president i zgjedhur, Hashim Thaçi thotë se zgjedhja e tij ka qenë në përputhje me Kushtetuesen. Sipas tij, procesi ishte shumë demokratik dhe gjithçka ishte në rregull.

“Opozita mund ta konsultojë Kushtetuesen, mirëpo nuk ka arsye. Për procesin e zgjedhjes time president, ne jemi konsultuar me ekspertë të ndryshëm ndërkombëtarë dhe të gjithë e kanë përkrahur procesin”, ka deklaruar presidenti i ri, i cili mandatin presidencial e merr zyrtarisht nga data 7 prill nga presidentja në ikje, Atifete Jahjaga.