Oliver Ivanoviq është i dyti me 1 mijë e 420 vota, ndërkaq kandidati i PDK-së, Florent Azemi ka marrë 565 vota. Kandidati i LDK-së, Musa Miftari mbetet i katërti me 449 vota.

Goran Rakiq i Listës SRPSKA ka shpallur fitoren në zgjedhjet për kryetar të Mitrovicës së Veriut, pak çaste më parë.

Siç merr vesh koha.net serbët po festojnë të qetë, me fishekzjarre dhe po i bien burive të makinave në pjesën veriore të qytetit të Mitrovicës.

Edhe mediat serbe kanë cituar kandidatin e listës qytetare serbe Rakiq të ketë deklaruar fitoren, teksa citojnë të ketë thënë se ndër detyrat e para të tij do të jetë kërkesa për mbrojtjen në liri të të gjithë serbëve të arrestuar, sipas tij pa të drejtë.

Kandidati i SDP-së, Oliver Ivanoviq, që po qëndron në Qendër të paraburgimit në Prishtinë, ka uruar Rakiqin për fitoren e tij, ka bërë me dije Tanjug.

Zëdhënësi i “Listës Srpska”, Alexander Spiriq, ka thënë në një konferencë shtypi se Rakiq, ka fituar 2.707 vota. Tre kandidatët tjerë sipas tij kanë bashkë 2,436 vota.

Në konferencën për media të Komisionit Qendror Zgjedhor të orës 20:00 është treguar se është mbyllur votimi në të gjitha 33 vendvotimet për kryetar të Komunës së Mitrovicës së Veriut.

KQZ ka treguar se në zgjedhje kanë dalë 5 mijë e 890, nga më shumë se 28 mijë qytetarë që kanë pasur të drejtë vote.

Kryetarja e KQZ-së Valdete Daka ka treguar se ka filluar numërimi, ndërsa nuk ka mundur të tregojë për kohën kur mund të dalin rezultatet preliminare të këtyre zgjedhjeve.