Zgjedhjet lokale, në fund të shtatorit 2013

Presidentja e vendit ka para vetes dy data: 22 dhe 29 shtatorin si datë kur do të votohet për kryetarët të komunave dhe për Asambletë Komunale

Kryetarëve aktualë të komunave kosovare u kanë mbetur vetëm edhe pesë muaj që të përfundojnë mandatin e tyre katërvjeçar, të fituar në zgjedhjet lokale, të vjeshtës së vitit 2009.

Katër vite më vonë, përkatësisht në fund të shtatorit të këtij viti, pritet të organizohen zgjedhjet lokale, meqë një kërkesë të tillë e kanë bërë shumica e partive politike te Presidentja e Kosovës, Atifete Jahjaga.

Presidentja e vendit ka para vetes dy data: 22 dhe 29 shtatorin si datë kur do të votohet për kryetarët të komunave dhe për Asambletë Komunale.

Sidoqoftë, Presidentja do të vendosë në për datën e zgjedhjeve lokale më së largu deri në mesin e muajit maj, kohë kjo kur do t’i përfundojë konsultimet me partitë politike.

Zëdhënësi i Presidentes, Arbër Vllahiu ka deklaruar se Shefja e Shtetit do të vendos për datën e zgjedhjeve duke u bazuar në propozimet e partive politike.

“Kah gjysma e muajit të ardhshëm, Presidentja do të mund të marrë vendimin, bazuar në afatet ligjore, për shpalljen e zgjedhjeve lokale, në pajtim me qëndrimet e partive dhe subjekteve politike”, thotë Vllahiu, shkruan Express.

“Konsultimet përfundimtare të Presidentes me partitë politike parlamentare dhe subjektet e tjera politike, do të zhvillohen brenda javëve të para të muajit maj”, ka shtuar ai.

Ndërkaq, zëdhënësi i Presidentes nuk jep përgjigje të prerë për datën e saktë ë zgjedhjeve, por thotë se partitë kanë kërkuar që data ajo të caktohet në vjeshtën e hershme të këtij viti.

“Përfaqësuesit e partive politike parlamentare dhe subjekteve të tjera politike, kanë shfaqur qëndrimet e tyre që zgjedhjet lokale të mbahen në vjeshtën e hershme të këtij viti, duke vlerësuar edhe aspektet teknike dhe kushtet e mbajtjes së zgjedhjeve. Ju e dini se periudha e mbajtjes së zgjedhjeve, sipas afatit ligjor, është mes 15 shtatorit dhe 15 dhjetorit”, ka deklaruar Vllahiu.

Zyrtarët e PDK’së pas takimit të parë me Presidenten kanë kërkuar që zgjedhjet të mbahen në muajit tetor, kurse LDK, Vetëvendosje dhe AAK kanë kërkuar që votimet për Kryetarë të komunave të mbahen më së largu në fund të muajit shtator.