Zjarr në Institutin e Mjekësisë Ligjore

Instituti i Mjekesise Ligjore, Kosove

Një zjarr ka shpërthyer në Institutin e Mjekësisë Ligjore të shtunën në mbrëmje. Për këtë ka informuar përmes rrjeteve sociale Ministria e Drejtësisë. Sipas njoftimit, zjarrfikësit kanë intervenuar menjëherë.

Shkaqet e zjarrit mbeten ende të panjohura, megjithatë nga ministria thonë se edhe policia ka dalë në vendin e ngjarjes. “Në orët e mbrëmjes, jemi njoftuar që në ndërtesën e Institutit të Mjekësisë Ligjore, ka shpërthyer një zjarr. Të menjëhershme kanë qenë intervenimet e zjarrfikësve. Policia është në vendin e ngjarjes po ashtu edhe zv. Ministri, Blerim Sallahu”, thuhet në njoftim, përcjellë albinfo.ch.

“Informata është marrë në ora 20:44 për zjarr në Institutin e Mjekësisë Ligjore. Ekipet e zjarrfikësve kanë dalë menjëherë në vendin e ngjarjes. Ishin duke u djegur disa tuba të letrave në 3 rafte dhe ishte krijuar tym i dendur. Është bërë shuarja e zjarrit dhe është bërë ventilimi i tymit nga ajo hapësirë”, ka thënë komandanti i zjarrfikësve për kallxo.com, përcjellë albinfo.ch.