41 persona të dyshuar për zjarrvënie në Kosovë

Policia identifikoi 41 persona të dyshuar dhe 20 tashmë janë arrestuar

Gjatë muajve të kaluar, në veçanti me ngritjen e temperaturave gjatë gushtit, shkaktimi dhe përhapja e zjarreve ka qenë shqetësuese për qytetarët e vendit dhe institucionet e tjera në përgjithësi.

Nga muaji qershor i këtij viti deri më 10.08.2021 janë evidentuar: 109 raste të ‘zjarrvënieve’, 71 raste ‘shkaktim i rrezikut të përgjithshëm’ dhe 95 incidente zjarri, duke shkaktuar kështu rrezik për jetën e qytetarëve, por edhe pronën në përgjithësi, si atë private, ashtu edhe atë shtetërore.

Lidhur me rastet e sipërcekura nga Policia e Kosovës të janë iniciuar procedura penale dhe janë identifikuar 41 persona të dyshuar si dhe janë arrestuar gjithsej njëzet persona të dyshuar të përfshirë në to.

“Gjatë kësaj periudhe ne falënderojmë qytetarët dhe institucionet e tjera për bashkëpunimin dhe ndihmën e ofruar në funksion të identifikimit të shpejtë të incidenteve të zjarrit, parandalimit të rasteve të tjera të rrezikut të përgjithshëm dhe shpërndarjen e informacioneve lidhur me vetëdijesimin për rrezikun potencial që mund të vijë nga veprimet e pakujdesshme të disa personave”, thuhet në njoftim.

Policia e Kosovës po ndërmerr dhe do të ndërmarrë masa të vazhdueshme ligjore ndaj të gjithë atyre individëve që në një formë apo tjetër rrezikojnë jetën apo pronën e qytetarëve, qoftë qëllimisht apo përmes pakujdesjes së shfaqur në çfarëdo forme.

“Policia e Kosovës, përveç realizimit të detyrave të saj në ruajtjen e rendit dhe sigurisë publike, menaxhimin dhe kontrollin e trafikut rrugor dhe lehtësimin e qarkullimit të mërgimtarëve nëpër pikat kufitare të Republikës së Kosovës gjatë kësaj periudhe me aktivitete të intensitetit dhe densitetit mjaft të madh në vendin tonë, vëmendje të veçante dhe resurse relevante ka ofruar për të asistuar edhe institucionet/agjencitë e tjera shtetërore, në parandalimin, hetimin dhe luftimin e zjarreve të shkaktuara”, thuhet më tej.

---