Zuckerberg kërkon falje: Facebooku, në betejë me Rusinë

Themeluesi i Facebookut, Mark Zuckerberg, ka deklaruar para senatorëve amerikanë se kompania e tij është në një betejë konstante me operatorët rusë, të cilët kanë për qëllim eksploatimin e këtij rrjeti social.

“Kjo është një garë. Ata po vazhdojnë të bëhen më të mirë”, ka deklaruar ai gjatë dëshmisë së tij në Senatin Amerikan, përcjell albinfo.ch.

Zuckerberg kërkoi falje publike për skandalin e privatësisë që ka dëmtuar emrin e rrjetit social Facebook, i themeluar prej tij më shumë se një dekadë më parë.

Më vjen keq, tha ai para Komisioni të Kongresit për Drejtësinë dhe Tregtinë, duke marrë mbi vete përgjegjësinë që nuk mundi të parandalonte shfrytëzimin e të dhënave të rreth 87 milionë përdoruesve, nga firma Cambridge Analytica, e lidhur me fushatën presidenciale të kandidatit Donald Trump.

Ai, gjithashtu, ka treguar se Robert Mueller, këshilltar special, i cili është duke hetuar ndërhyrjen e Rusisë në zgjedhjet e 2016-s, ka intervistuar stafin e Facebookut . Zuckerberg ka bërë të ditur se kompania është duke zhvilluar mekanizma të rinj për të identifikuar llogaritë false në Facebook.