Zürich Shqip Up Comedy Festival

Edicioni i parë i Festivalit pritet të jetë një ngjarje e madhe kulturore, ku priten të qeshura ta pafund që do të nxiten nga aktorët shqiptarë më në zë të humorit

I planifikuar për fillim në vitin 2020, por që për shkak të gjendjes pandemike të gjitha aktivitetet kulturore dhe sportive ishin anuluar, Zürich Shqip Up Comedy Festival do të shohë dritën në nëntor të këtij viti.

Edicioni i parë i Festivalit të Stand Up Komedisë pritet të jetë një ngjarje e madhe kulturore, ku priten të qeshura ta pafund që do të nxiten nga aktorët më në zë të këtij zhanri në trojet shqiptare.

Edhe pse tashmë dihen emrat e performuesve nga organizatorët, ata duke mos dashur ende t’i bëjnë të ditur, duan që ta befasojnë publikun.

Ndërsa, për relaksin pas të qeshurave, mbrëmja më pas do të përcillet edhe me muzikë cilësore nga trioja e famshme nga Kosova ‘ Dont listen to your Neighbours»

«Një zviceran i moshuar kishte thënë njëherë se e qeshura është shëndet. Ne kemi tashmë mbi dy vjet që jemi duke punuar në këtë projekt, por nëse arrijmë që përmes të qeshurave të ndikojmë në të mirë të shëndetit të publikut, atëherë ia ka vlejtur i tërë mundi», shprehen me humor për Albinfo.ch organizatorët, aktori dhe producenti Ridvan Murati si dhe Alban Hamza.

Projekti i Zürich Shqip Up Comedy Festival organizohet nga Organizata Kulturore PLAN K në bashkëpunim me PLAN B dhe si i tillë është përkrahur edhe nga Ministria e Punëve të Jashtme dhe Diasporë e Republikës së Kosovës, si dhe nga biznese të komunitetit shqiptar në Zvicër.

Përderisa, dritarja më e madhe dhe më serioze e informimit të shqiptarëve në diasporë, Albinfo.ch, do të jetë Sponzor medial i kësaj ngjarjeje kulturore.

«Zürich Shqip Up Comedy Festival» do të mbahet më 19.11.2022 në Shed15 events&more në adresën Zürichstrasse 15-17, 8607 Seegräben. 

---