Zvicër: Epidemi e rëndë gripi, rastet në rritje

Epidemia e gripit këtë vit veçanërisht e rëndë, autoritetet paralajmërojnë se kulmi ende nuk është arritur

Epidemia e gripit këtë vit po konsiderohet veçanërisht e rëndë, ndërsa autoritetet shëndetësore paralajmërojnë se situata pritet të përkeqësohet në javët në vijim, përcjell albinfo.ch.

Sipas Zyrës Federale të Shëndetit Publik, numri i rasteve të raportuara tregon se vala aktuale e gripit është më e fortë krahasuar me vitet e kaluara. Në mesin e muajit dhjetor u regjistruan rreth 15 raste gripi për çdo 100 mijë banorë, ndërsa menjëherë pas Vitit të Ri kjo shifër është rritur ndjeshëm në 33.5 raste për 100 mijë banorë, duke u më shumë se dyfishuar.

Megjithatë, autoritetet theksojnë se kulmi i epidemisë ende nuk është arritur, çka nënkupton se numri i të infektuarve pritet të rritet më tej.

Institucionet shëndetësore u bëjnë thirrje qytetarëve të tregojnë kujdes të shtuar, të ndjekin rekomandimet mjekësore dhe të respektojnë masat parandaluese, veçanërisht për grupet më të rrezikuara.

---