Zvicër: Rënie e madhe e kriminalitetit të të rinjve

Numri i plaçkitjeve në Kantonin e Bernës ka rënë madje për 83 për qind krahasuar me një vit më parë!

A është duke rënë niveli i dhunës së të rinjve në Zvicër? Statistikat e fundit, së paku sa i përket kantoneve Bernë, Freiburg, Siolothurn dhe Lucern kanë treguar pikërisht këtë trend.

Kështu, siç ka deklaruar udhëheqësi i prokurorisë për të rinjtë në Kantonin e Bernës në emisionin 10vor10 të sf1, gjatë vitit 2011 në këtë kanton ka pasur 48% më pak raste të lëndimeve trupore.

Ndërkaq numri i plaçkitjeve ka rënë madje për 83 për qind krahasuar me një vit më parë! Ndërkohë, ekspertët nuk kanë një mendim unik për shkaqet e kësaj rënieje të shkallës së dhunës në mesin e të rinjve.

Kriminologu i njohur nga Cyrihu, Martin Killias thotë se “kjo ka të bëjë shumë me proceset shoqërore. Dënimi i shoqërisë për dhunën e të rinjve është sot më i madh se më parë”.

Veç kësaj Killias thotë se përqindja e të rinjve me prejardhje të huaj sot është më e vogël se para pak viteve. “Dhe, vëllezërit e të rinjve të djeshëm me prejardhje të huaj sot janë më të kujdesshëm që të mos shkaktojnë probleme sikur vëllezërit e tyre pak më të vjetër”.