U arrestua edhe zvicerani i dytë në Marok për vrasjen e dy turisteve

Foto ilustrim

Një shtetas i dyfishtë zviceran-britanik u arrestua të enjten në Marok në lidhje me vrasjen e një  danezeje dhe një norvegjezeje, të cilat ishin duke bërë hiking në malet Atlas.

Policia Federale Zvicerane (Fedpol) ka konfirmuar lajmin për arrestimin që u botua së pari nga gazeta marokene 360. Roli i tij në vrasjet ende nuk dihet.

Sipas gazetës, i dyshuari u arrestua në Témara (në veri të Casablanca) nga Brigada Kombëtare e Policisë Gjyqësore. Burri jetonte në Marok dhe nuk u kthye në Zvicër së fundmi, tha Fedpol, të cilit ende nuk i është kërkuar nga Maroku të hetojë individin, përcjell albinfo.ch.

Një studente daneze 24-vjeçare dhe mikja e saj, një 28-vjeçare norvegjeze, u vranë natën e 16 dhjetorit në Marokun jugor, ku ishin në pushime. Trupat e tyre u zbuluan në një zonë të izoluar në Atlasin e Lartë, një zonë e njohur për alpinistët.

I dyshuari i parë zviceran (një shtetas i dyfishtë zviceran-spanjoll), i cili u arrestua më 29 dhjetor, ende është në paraburgim. Ai dyshohet se ishte pjesë e një operacioni për të rekrutuar njerëz për të kryer akte terroriste në Marok. I lindur në Gjenevë, dyshohet se po radikalizohej në Zvicër. Ai ka një dosje penale në Gjenevë për krime të ndryshme të kryera midis 2007 dhe 2013-ës.