Zvicra mbështet hartimin e Projektligjit për Financat e Pushtetit Lokal

Marrëveshjen e Bashkëpunimit për hartimin e Projektligjit për Financat e Pushtetit Lokal e ka mbështetur agjencia zvicerane DEMOS, e cila edhe i bashkërendon veprimet ndemjet Ministrisë së Financave dhe KLGI-së

Ministria e Financave dhe Instituti Kosovar për Qeverisje Lokale (KLGI) kanë nënshkruar sot (e enjte) një  Marrëveshje Bashkëpunimi për hartimin e Projektligjit për Financat e Pushtetit Lokal. Këtë marrëveshje e ka mbështetur agjencia zvicerane Helvetas – DEMOS, e cila edhe i bashkërendon veprimet ndemjet këtyre dy institucioneve.

Marrëveshja u nënshkrua nga ministri i Financave, Avdullah Hoti dhe drejtori ekzekutiv i Institutit KLGI Besnik Tahiri, ku prezentë ishte edhe Menaxheri i Programeve në DEMOS, Norbert Pijls.

Projektligji për Financat e Pushtetit Lokal është njëri ndër ligjet më vitale, i cili ofron efikasitet dhe qëndrueshmëri për komunat. Përmes këtij bashkëpunimi në procesin e hartimit të këtij Ligji do të jetë një sukses i përbashkët në përkrahjen e komunave dhe fuqizimin e qeverisjes lokale.

“Nënshkrimi i kësaj marrëveshje gjithashtu do të jetë një vlerë e re e mbështetjes për institucione, si dhe një aspekt qenësor në  ofrimin e modeleve të bashkëpunimit dhe koordinimit drejt reformave dhe fuqizimit të themeleve evropiane të qeverisjes lokale. Gjithashtu përmes kësaj marrëveshje vendosen parimet, përgjegjësitë dhe mënyrat e bashkëpunimit”, thuhet në një njoftim lëshuar nga Ministra e Financave.

Marrëveshja përfshin edhe pjesën e bashkërendimit dhe bashkëpunimit me Helvetas – DEMOS.

Ndryshe, mbështetja e Institutit KLGI për Ministrinë e Financave ofrohet në kuadrin e projektit “Një përpjekje drejt një qeverisje lokale të qëndrueshme dhe funksionale” i financuar nga Zyra Zvicerane për Bashkëpunim në Kosovë (SCO-K) dhe Ministria e Punëve të Jashtme të Danimarkës (DANIDA) Fondacioni Kosovar për Shoqëri Civile (KCSF) ku shtyllë të aktiviteteve ka “Financat Lokale dhe Zhvillimin Ekonomik”.