Pas miratimit nga Dhoma Kombëtare, edhe Komisioni për Shkencë, Arsim dhe Kulturë i Dhomës së Kantoneve ka dhënë dritën e gjelbër për kandidaturën zvicerane. Propozimi është mbështetur me 10 vota pro, asnjë kundër dhe dy abstenime, përcjell albinfo.ch.
Komisioni ka propozuar gjithashtu disa saktësime lidhur me financimin dhe pjesëmarrjen e kantoneve në organizimin e kësaj ngjarjeje të madhe sportive. Mbështetja financiare e Konfederatës mund të arrijë deri në 200 milionë franga, ndërsa kantonet dhe komunat pritet të kontribuojnë gjithashtu në mbulimin e shpenzimeve.
Zvicra aktualisht gëzon një pozitë të veçantë në procesin e kandidimit, pasi Komiteti Olimpik Ndërkombëtar i ka mundësuar të zhvillojë bisedime të privilegjuara për organizimin e Lojërave të vitit 2038. Kjo i jep vendit mundësinë të përgatisë kandidaturën pa konkurrencë të drejtpërdrejtë gjatë kësaj faze.
Sipas Swiss Olympic, dosja e kandidaturës duhet t’i dorëzohet Komitetit Olimpik Ndërkombëtar në shkurt të vitit 2027, ndërsa vendimi për organizimin e Lojërave mund të merret gjatë sesionit të Komitetit në fund të prillit ose fillim të majit të po atij viti.
Projekti “Switzerland 2038” synon që garat olimpike dhe paralimpike të zhvillohen në disa rajone të Zvicrës, duke shfrytëzuar infrastrukturën ekzistuese sportive dhe duke përfshirë pjesë të ndryshme të vendit. Organizatorët synojnë një model të decentralizuar, me theks në qëndrueshmëri dhe bashkëpunim ndërmjet rajoneve.
Megjithatë, kandidatura nuk është miratuar ende përfundimisht. Procesi parlamentar dhe përgatitjet financiare duhet të përmbyllen përpara se Zvicra të marrë vendimin përfundimtar nga Komiteti Olimpik Ndërkombëtar.
