Zvicra, partnere e rëndësishme e Kosovës

“Zvicra është në vazhdimësi partner shumë i rëndësishëm evropian i Kosovës”, tha kryeministri Mustafa gjatë një takimi lamtumirës që zhvilloi me ambasadoren zvicerane Krystyna Marty Lang

Kryeministri i Republikës së Kosovës, Isa Mustafa e falënderoi Ambasadoren e Zvicrës në Kosovë, Krystyna Marty Lang për kontributin e saj për fuqizimin e raporteve të shkëlqyera ndërmjet dy vendeve. Gjatë takimit lamtumirës, Mustafa tha se Zvicra vazhdon të mbetet partneri më strategjik i Kosovës.

Kryeministri kosovar po ashtu, shprehu mirënjohjen e qytetarëve dhe të Qeverisë së Kosovës për përkrahjen konkrete të Zvicrës për Kosovën në shumë fusha, duke shprehur përkushtimin për fuqizimin e mëtejmë të marrëdhënieve bilaterale.

“Zvicra është në vazhdimësi partner shumë i rëndësishëm evropian i Kosovës”, tha kryeministri Mustafa.

Ambasadorja e Zvicrës në Kosovë, Krystyna Marty Lang, e falënderoi kryeministrin Mustafa për bashkëpunimin e ofruar nga Qeveria e Kosovës gjatë mandatit në Kosovë. ajo po ashtu vlerësoi të arriturat në Kosovë dhe shprehu përkrahjen e mëtejme të Zvicrës për Kosovën.

Gjatë takimit, u diskutua edhe për progresin dhe proceset aktuale në Kosovë, si dhe hapat e Kosovës në zhvillimin ekonomik, proceset eurointegruese dhe fuqizimin e shtetit ligjor.