Zvicra përfshihet nga vala e dytë e nxehtësisë

Vala e parë e nxehtësisë ka kaluar nëpër Zvicër nga fundi i qershorit

Brenda më pak se një muaji, Zvicra do të përjetojë valën e dytë të madhe të nxehtësisë. Sipas SRF Meteo, nga e marta (nesër) deri të premten në Zvicër priten temperatura të larta deri në 35 gradë.

Për regjionet e njohura për temperatura më të larta, siç janë zona në veri të Alpeve, kantoni Valis dhe pjesa jugore e Kantonit Tiçino, autoritetet federale tashmë kanë vendosur shkallën 3 të emergjencës për shkak të nxehtësisë së madhe.

Gjithsej janë pesë shkallë të tilla në Zvicër, të cilat përcaktojnë rrezikun nga temperaturat e larta.

Ndërkohë, në zonën e mesme të Zvcirës dhe pjesërisht në Valis, në Tiçino dhe në Graubünden mbretëron një rrezikshmëri e konsiderueshme për shpërthimin e zjarreve në pyje.

Vala e parë e nxehtësisë ka kaluar nëpër Zvicër nga fundi i qershorit. Në atë periudhë, nga meteorologët ishin paraparë temperatura rekorde deri në 38 gradë, ndërsa ato ishin ngjitur “vetëm” deri në 36.9 gradë celsius.

Për fund të javës parashihet një freskim i vogël i motit.

---