Përfaqësuesja e Zvicrës përballet sonte me Slloveninë në Maribor, me mundësinë për ta siguruar para kohe rikthimin në Ligën A të Ligës së Kombeve, përcjell albinfo.ch.
Pas katër ndeshjeve, skuadra e drejtuar nga Murat Yakin kryeson Grupin B1 me 12 pikë, pesë më shumë se Sllovenia. Një barazim do t’i mjaftonte për ta siguruar matematikisht vendin e parë, pa pritur takimin e fundit kundër Skocisë.
Zvicra ka regjistruar katër fitore në këtë edicion. Në përballjen e parë ndaj Sllovenisë, të zhvilluar në Lucern, zviceranët fituan me rezultat 2:1.
Në mungesë të Granit Xhakës së lënduar, shiritin e kapitenit do ta mbajë Manuel Akanji. Ai ka theksuar se synimi i ekipit është që çështjen e kualifikimit ta mbyllë që në këtë ndeshje.
Takimi ishte planifikuar të zhvillohej në Lubjanë, por u zhvendos në Maribor për shkak të gjendjes së dobët të fushës. Ndeshja nis në orën 20:45, në stadiumin “Ljudski vrt”./Albinfo.ch
