Zvicra ua ka ndaluar hyrjen 39 të dyshuarve për xhihadizëm

Fedpoli planifikon të krijojë një bazë të re ligjore që mundëson marrjen e masave kundër xhihadizmit edhe jashtë procedurës penale

Gjatë vitit të kaluar Zvicra ua ka ndaluar hyrjen 39 personave bazuar në faktin se kanë treguar simpati për xhihadin. Lidhur me këto dyshime, Zyra Federale për Polici (Fedpol) ka lëshuar urdhërndalesat për kaq persona.

Po ashtu gjatë vitit 2016 janë trajtuar 70 raste të xhihadizmit, njofton më tutje Zyra Federale. Sipas saj në luftimin e terrorizmit megjithatë ka ende boshllëqe të konstatuara. Për këtë arsye Fedpoli planifikon të krijojë një bazë të re ligjore që mundëson marrjen e masave kundër xhihadizmit edhe jashtë procedurës penale.

Kjo nënkupton që të dyshuarit të detyrohen që të paraqiten personalisht në stacione policore ose që të krijohet mundësia e bllokimit të pasaportave. Propozimet në këtë drejtim do t`u jepen Këshillit Federal gjatë vitit 2017.