Zyra e Macronit: “Jo pezullim, por një debat që duhet bërë me partnerët”

"Është një proces teknik dhe një diskutim që duhet bërë me partnerët tanë evropianë”, thuhet në përgjigjen e kabinetit të Presidentit të Francës, Macron

“Çështja e liberalizimit të vizave për Kosovën `mbetet e hapur`”. Kështu është thënë nga Zyra e presidentit të Francës, Emmanuel Macron, në një deklaratë për shtyp të martën, pas deklarimit publik të presidentit Macron lidhur me pezullimin e procesit të vizave.

Siç është raportuar tashmë, Presidenti Macron ka thënë të martën në Tiranë se Franca mund ta pezullojë procesin e liberalizimit të vizave për Kosovën, për shkak “të mosrespektimit të fjalës së dhënë”, duke e akuzuar Kosovën se nuk e ka mbajtur fjalën e dhënë për formimin e Asociacionit.

Zyra e presidentit të Francës ka dhënë një sqarim lidhur me këtë çështje përmes një deklarate për mediat shqiptare.

“Presidenti ka folur për tensionet mes Serbisë dhe Kosovës. Ai tha se cilat ishin kërkesat tona. Në këtë kontekst dhe duke marrë parasysh bllokadën e Prishtinës, presidenti vlerësoi se çështja e liberalizimit të vizave mbetet e hapur”, tha Zyra e Presidentit të Francës në një përgjigje për mediumin ABC News.

“Për më tepër, është një proces teknik dhe një diskutim që duhet bërë me partnerët tanë evropianë”, thuhet në përgjigjen e kabinetit të Macronit.

Nga disa media në Kosovë dhe Shqipëri është raportuar se Macroni ka deklaruar në Tiranë se Franca ka suspenduar vendimin për liberalizimin e vizave.

Ndërkaq, agjencia franceze e lajmeve, AFP, lidhur me deklaratën e Macronit në Tiranë për vizat, ka shkruar se me këtë “ai e ka kërcënuar Kosovën me zhbërjen e vendimit të vizave”.

Vendimi për liberalizimin e vizave për Kosovën pritet të hyjë në fuqi më 1 janar 2024.

Macron foli për vizat në Tiranë duke e ndërlidhur situatën politike mes Kosovës dhe Serbisë.

 

---