1.5 miliardë, nga turizmi

Shqipëria ka përfituar mbi 1 miliard e gjysmë euro nga turizmi në vitin 2016.  Bëhet fjalë për nivelin më të lartë të të gjitha kohërave.

Siç raporton Banka e Shqipërisë, duke publikuar në bilancin e pagesave, rezulton se krahasuar me vitin 2015 të ardhurat nga turizmi u rritën për 13 për qind, duke i sjellë ekonomisë së vendit 175 milionë euro më shumë.

Këto janë para që shtetasit e huaj dhe emigrantët shqiptarë, që jetojnë jashtë, kanë shpenzuar gjatë vizitave të tyre në Shqipëri për pushime, biznes, apo qëllime të tjera.

Siç raportojnë medait në Shqipëri, turizmi ishte një nga sektorët që u godit më fort nga kriza financiare. Pas 2009-ës, të ardhurat, udhëtimet e jorezidentëve në ekonominë shqiptare ranë për 4 vjet me radhë, duke zbritur deri në 1.1 miliardë euro në 2013-ën.