Pothuajse 1 në 10 burra që punojnë me orar të plotë në Zvicër duan të punojnë më pak

Dëshira për të reduktuar angazhimin në punë është e përhapur gjerësisht te burrat, por rrallëherë realizohet, sipas një studimi të Universitetit të Cyrihut.

Shumë burra në Zvicër që punojnë me orar të plotë do të donin ta reduktonin angazhimin e tyre në punë, por vetëm një pakicë mund ta bëjë këtë. Kjo është ajo që del nga një studim i Universitetit të Cyrihut, i bazuar në të dhëna të mbledhura midis viteve 2004 dhe 2020, i cili ka ndjekur evolucionin e preferencave profesionale të burrave ndër vite.

Hulumtimi tregon se çdo vit, pothuajse 10% e burrave të punësuar me orar të plotë shfaqin dëshirën për të reduktuar orarin e punës, por vetëm një në dhjetë e vë atë në praktikë.

Zvicra, ndër vendet me më shumë punë me kohë të pjesshme

Me një përqindje prej 40% të të gjithë të punësuarve që punojnë me kohë të pjesshme, Zvicra renditet e dyta midis vendeve të OECD-së.

Trendi po prek gjithnjë e më shumë burrat: pjesa e atyre që punojnë me kohë të pjesshme është dyfishuar që nga viti 2000, duke kaluar nga rreth 10% në mbi 20%. Në të njëjtën periudhë, mesatarja e vendeve të Organizatës për Bashkëpunim dhe Zhvillim Ekonomik (OECD) u rrit nga 8% në pak më pak se 13%.

Pesha e modeleve tradicionale

Pengesat kryesore nuk janë domosdoshmërisht ekonomike, por kulturore dhe të lidhura me mjedisin profesional, vëren studimi.

Në sektorët ku ideja e burrit si mbështetësi kryesor ekonomik i familjes është ende e fortë dhe ku kërkohet përkushtim i madh ndaj punës, burrat janë më pak të prirur të dëshirojnë ose të zgjedhin një punë me kohë të pjesshme, raporton RSI. Përkundrazi, në kontekstet profesionale që nxisin një ekuilibër më të mirë midis punës dhe jetës private, prirja për të reduktuar angazhimin në punë është më e lartë, transmeton albinfo.ch.

Modelet e punës ndryshojnë

Autorët vërejnë një largim gradual nga modeli tradicional i punësimit me orar të plotë dhe një përhapje në rritje të formave më fleksibël të punës.

Sipas Jan Müller, drejtuesit të studimit, në Zvicër kushtet për një reduktim të orarit të punës janë relativisht të favorshme. Java normale e punës, e cila është afër 42 orëve, e bën uljen e angazhimit në punë veçanërisht tërheqëse. Për më tepër, pagat përgjithësisht të larta e bëjnë më të lehtë përballimin e një reduktimi të të ardhurave sesa në shumë vende të tjera.

Rasti i mjekëve

Ndër shembujt që ilustrojnë ndryshimin në vazhdim është profesioni i mjekut. Në fakt, gjithnjë e më shumë burra që punojnë në sektorin e shëndetësisë po zgjedhin të punojnë me kohë të pjesshme.

Sipas Müller-it, në këtë profesion roli i burrit si mbështetësi i vetëm ekonomik i familjes e ka humbur rëndësinë, ndërsa është rritur vëmendja ndaj ekuilibrit mes punës dhe jetës private. Një evolucion që vetë studiuesi e quan befasues, duke marrë parasysh se profesioni i mjekut lidhet tradicionalisht me ritme intensive pune dhe shumë orë shtesë.

Më pak stres dhe më shumë barazi

Hulumtimi nxjerr në pah mekanizmat që favorizojnë rritjen e punës me kohë të pjesshme te burrat. Për Müller-in, mundësia për ta përshtatur nivelin e punësimit me preferencat personale ndihmon në uljen e stresit dhe mund të nxisë një barazi më të madhe mes grave dhe burrave në ndarjen e detyrave profesionale dhe familjare.

---