10 për qind të dokumenteve për leje qëndrimi, të falsifikuara

Rreth dhjetë për qind të dokumenteve për leje qëndrimi në Zvicër kanë rezultuar të falsifikuara Bëhet fjalë për shtetas të vendeve të treta, njerëz të cilëve u nevojitet viza për qëndrim në Zvicër, përcjell albinfo.ch. Dhe, në këtë mes hyjnë shtetasit e Kosovës, të Shqipërisë, Serbisë, Turqisë etj.

Po vjen vazhdimisht duke u rritur numri i personave nga shtetet jashtë BE-së të cilët me dokumente të falsifikuara paraqiten si qytetarë të BE-së, në mënyrë që të sigurojnë një leje qëndrimi të rregullt në Zvicër.

Siç shkruan gazeta “NZZ am Sonntag”, ajo që deri tash dëgjohej më shumë në formë thashethemesh e anekdotash, është bërë së fundi objekt hulumtimi i një projekti pilot të realizuar në Bernë, transmeton albinfo.ch.

Sipas të gjeturave të këtij projekti, rreth dhjetë për qind të kërkesave për leje qëndrimi në Zvicër kanë rezultuar të mbështetura në dokumente të  falsifikuara. Këtë e ka konfirmuar për gazetën në fjalë Alexander Ott, shef i shërbimeve civile të Bernës.

Bëhet fjalë për shtetas të vendeve të treta, njerëz të cilëve u nevojitet viza për qëndrim në Zvicër, përcjell albinfo.ch. Dhe, në këtë mes hyjnë shtetasit e Kosovës, të Shqipërisë, Serbisë, Turqisë, pastaj rusët, kinezët dhe brazilianët.

Me projektin e përmendur më lart, autoritetet federale dhe ato të kantoneve synojnë që përmes 70 masave të ndryshme të ndërmarra të ngrenë nivelin e sigurisë së brendshme të Zvicrës. masat drejtohen më së shumti kundër migracionit ilegal dhe kriminalitetit ndërkufitar.