10-vjeçarja britanike mund të bëhet olimpistja më e re

Një 10-vjeçare mund të bëhet olimpistja më e re e Britanisë, pasi u përzgjodh në një ekip prej pesë skejtborderëve, të cilët do të marrin fonde për t’u ndihmuar të kualifikohen për Lojërat e Tokios 2020. 

Nëse kualifikohet, Sky Brown do të jetë 12 vjeç e 12 ditë, kur lojërat do të fillojnë në korrik të 2020-s, duke eklipsuar rekordin e notueses Margery Hinton, e cila ishte 13 vjeç e 43 ditë kur garoi në Lojërat Olimpike të 1928-s në Amsterdam. 

Brown, e lindur në Japoni, tha se ëndrra e saj ishte ta fitonte Olimpiadën. Brown dhe katër të tjerë, Alex Decunha, Sam Beckett, Alex Hallford dhe Jordan Thackeray,  u zgjodhën nga Skateboard GB për të përfituar nga Aspiration Fund i Britanisë që synon t’i ndihmojë ata të marrin pjesë në ngjarje kualifikuese, përcjell albinfo.ch.

“Jam e lumtur me faktin se mund të bëhem olimpistja më e re. Kjo do të shërbejë për të treguar se mosha s’ka rëndësi për të arritur diçka të madhe. Mendoj se mund ta arrij këtë”, tha mes tjerash Brown. Skateboarding në Lojërat e Tokios do të ketë gjithsej katër ngjarje, për po aq medalje.