110,7 milionë dollarë, për një pikturë të Monet

Një pikturë e serisë ”Meules” (”Mullarët e kashtës”) e piktorit francez Claude Monet u ble të martën në Nju-Jork për 110,7 milionë dollarë, gjatë ankandit të organizuar nga shtëpia ‘’Sotheby’s’’.

Kjo shumë regjistron një rekord botëror për artistin. Çmimi përfshin komisionin dhe shpenzimet.

Kjo është hera e parë që një pikturë impresioniste kapërcen pragun simbolik të 100 milionë dollarëve.

Piktura e përmasave 72×92 është pjesë e një koleksioni të pikturuar nga Monet gjatë stinës së dimrit 1890-1891 në shtëpinë e tij në Giverny, Normandi, shkruan KP, përcjell Albinfo.ch.

Një vepër tjetër e serisë “Meules” u shit në nëntor të 2016 nga shtëpia Christie’s në Nju-Jork për 81,4 milionë dollarë.