Luftërat, protestat, varfëria dhe frika marrin formë artistike në ekspozitën “L’Anatomie du Chaos” (Anatomia e Kaosit), të artistit shqiptar Ramë Dardania, në Vevey të Zvicrës.
Përmes pikturës, skulpturës dhe instalacionit, Dardania sjell një reflektim të fuqishëm mbi realitetin e trazuar të botës së sotme.
Luftërat, protestat, pabarazia sociale, varfëria dhe pasiguria ndërthuren me gjendjen emocionale të njeriut, frikërat dhe ankthin e tij për të ardhmen.
Një vend të veçantë në ekspozitë zënë gurët e trotuarit, të cilët nga objekte të zakonshme të hapësirës publike shndërrohen në simbole të protestës, revoltës dhe rezistencës. Ata mbartin kujtesën e rrugëve, të përplasjeve shoqërore dhe të zërit të njerëzve që kërkojnë ndryshim.
Me ngjyra shpërthyese dhe figura ekspresive, artisti ndërton një botë ku kaosi i jashtëm takohet me atë të brendshëm, duke nxjerrë në pah brishtësinë, frikën, por edhe forcën e njeriut.
Ekspozita prezantohet nga Fondation Artists-Way, në bashkëpunim me Fresa y Chocolate Gallery.
Hapja zyrtare mbahet më 19 nëntor 2026, nga ora 18:00 deri në 20:30, në Fresa y Chocolate Gallery, Vevey, Zvicër.
