Vetëm 36% do ta votonin iniciativën kundër migrimit masiv!

Kjo iniciative e votuar me një rezultat të ngushtë në shkurt të vitit 2014, i ka shkaktuar jo pak telashe Zvicrës në raport me BE-në

Popullsia e Zvicrës, aktualisht është më e gatshme për të mbështetur marrëveshjet bilaterale me BE-në se që ka qenë vetëm disa muaj më parë.

Siç dëshmon sondazhi i radhës i realizuar nga Instituti për Studimin e Opinionit Publik GFS Bern, 46 për qind e zviceranëve shohim te marrëveshjet bilaterale më pak ose më shumë përparësi për Zvicrën, njofton srf.ch.

Në sondazhin e kaluar, të bërë në tetor të vitit 2015, ishin 42%.

Katër nga pesë të anketuarit e arsyetojnë qëndrimin e tyre pozitiv para së gjithash me faktin se ekonomia e Zvicrës është e varur nga marrëdhëniet stabile me BE-në.

Nga ana tjetër , vetëm 36 për qind e të pyeturve ende do të votonin në favor të Iniciativës kundër Migracionit Masiv.

Siç dihet, kjo iniciative e votuar me një rezultat të ngushtë në shkurt të vitit 2014, i ka shkaktuar jo pak telashe Zvicrës në raport me BE-në, shkruan albinfo.ch. Si rezultat i saj, Zvicra rrezikon t`i ndërpresë marrëveshjet bilaterale me Bashkimin Evropian.

Për këtë anketë GFS Bern ka pyetur 2507 persona me të drejtë vote, nga 18 prilli deri më 7 maj.