Nuk shtrenjtohen cigaret

Partitë kritikonin se kjo ngritje do të shkaktonte dalje të zviceranëve jashtë vendit për të blerë cigare me çmim më të lirë dhe akuzonin qeverinë se donte ta shfrytëzonte taksën e duhanit si një burim komod e të lehtë të ardhurash

Duhanxhinjtë në Zvicër mund “të marrin frymë” më lirisht: tash për tash nuk do të ketë shtrenjtim të cigareve. Këshilli Federal ka vendosur që çmimi i cigareve të mbetet me të vjetrën. Në fakt ai heq dorë nga kalimi i kompetencave te parlamenti për ngritjen e taksave të duhanit.

Hapësirën e vet të veprimit për ngritjen e taksës së duhanit, qeveria e vendit e kishte konsumuar në vitin 2013 me ngritjen e saj për 10 centë. Në diskutim ishte ngritja e shkallëzuar e çmimit për 2.80 franga që do të rezultonte me një çmim prej 11 frangash të një paqete të cigareve në shitje të lirë.

Por për ta bërë këtë gjë, Këshilli Federal kishte nevojë për bekimin e parlamentit. Ndërkaq, në procedurën konsultative u pa se një ngritje e tatimit kishte fare pak shanse. CVP/PDC druante se kjo ngritje do të shkaktonte dalje të zviceranëve jashtë vendit për të blerë cigare me çmim më të lirë. FDP/PLR dhe SVP/UDC akuzonin qeverinë se donte ta shfrytëzonte taksën e duhanit si një burim komod e të lehtë të ardhurash.

Por, duket se goditjen përfundimtare në këtë drejtim e dha frangu i fortë. Pas ndryshimit të kursit të frangut në raport me euron, dallimi në çmim në krahasim me vendet fqinje ishte zhvilluar në dëm të Zvicrës. Kështu, ndërkohë që në vitin 2007 cigaret në Zvicër ishin më të lirat pas atyre në Austri, ato në vitin 2016 janë më të shtrenjtat.