Qeveria gjermane planifikon të përgjysmojë kuotën e punësimit të punonjësve nga Ballkani Perëndimor duke filluar nga janari i vitit 2027. Kjo do të thotë që vetëm 25,000 njerëz nga Ballkani Perëndimor mund të punësohen në Gjermani çdo vit, transmeton albinfo.ch. Edhe para kësaj, kuota ishte tashmë e pamjaftueshme për të gjitha aplikimet në vitin 2025 dhe do të shterohet përsëri para fundit të këtij viti.
Rregullorja e re ishte prezantuar në vitin 2016 për qytetarët e Shqipërisë, Bosnjës dhe Hercegovinës, Kosovës, Maqedonisë së Veriut, Malit të Zi dhe Serbisë. Ata mund të marrin vizë për të punuar në Gjermani në kushte të thjeshtuara. Rregulli zbatohet për të gjitha llojet e punësimit dhe përfshin edhe punët e pakualifikuara.
Agjencia Federale e Punësimit me seli në Nyremberg ka paralajmëruar qeverinë gjermane kundër çdo shkurtimi në të ashtuquajturën Rregullore të Ballkanit Perëndimor për punëtorët nga vendet jo-anëtare të BE-së në rajon, si Serbia dhe Kosova, shkrun DPA. Më shumë se një milion njerëz nga Ballkani Perëndimor tani janë të punësuar në Gjermani dhe u nënshtrohen kontributeve të sigurimeve shoqërore, njoftoi agjencia në Nyremberg.
Kuota aktuale prej 50,000 personash në vit nga rajoni që mund të vijnë në Gjermani për të punuar nuk duhet të zvogëlohet, tha Vanessa Ahuja, anëtare e bordit të Agjencisë Federale të Punësimit përgjegjëse për këtë fushë, përcjell albinfo.ch,
Përgjysmimi i Kuotës përkeqëson mungesën e punëtorëve të kualifikuar
53 për qind e të ardhurve nga Ballkani Perëndimor punojnë në Gjermani si punëtorë të kualifikuar ose me kualifikime më të larta, dhe rreth gjysma janë të punësuar në profesione me mungesë për të cilat nuk ka punëtorë të mjaftueshëm në dispozicion në Gjermani.
“Një kuotë e përgjysmuar do të dobësojë një model të suksesshëm imigracioni, do të përkeqësojë mungesën e punëtorëve të kualifikuar dhe do ta bëjë më të vështirë për kompanitë të gjejnë punonjës të rinj. Nëse investimet speciale dhe një bum ndërtimi do të kenë sukses, kompanitë duhet të gjejnë punëtorët e duhur”, tha eksperti i tregut të punës.
