189 refugjatë humbin statusin pasi kanë vizituar vendet e prejardhjes

63 nga ky numër janë shtetas të Irakut, 21 të Vietnamit, 20 të Bosnjë e Hercegovinës, 17 të Turqisë, 14 të Tunizisë dhe 7 të Eritresë

Refugjatët, sipas vetë përkufizimit të statusit të tyre, nuk kanë të drejtë të shkojnë në vendin e prejardhjes, nga i cili kanë ikur. Duke qenë se gjithmonë ka të tillë që e shpërfillin këtë rregull, gjithmonë ka edhe dënime për ata që kapen. Bëhet fjalë për humbjen e statusit të fituar të azilit.

Siç shkruan gazeta “NZZ am Sonntag”, gjatë vitit 2015, 189 refugjatë me status të njohur e kanë humbur këtë status si pasojë e vizitës që u kanë bërë vendeve të prejardhjes.

Këtë shifër gazeta e ka marrë nga burime brenda SEM (Sekretariati Shtetëror për Migracion), transmeton albinfo.ch.

63 nga ky numër janë shtetas të Irakut, 21 të Vietnamit, 20 të Bosnjë e Hercegovinës, 17 të Turqisë, 14 të Tunizisë dhe 7 të Eritresë.

Numri i dënimeve të përmendura, vitin e kaluar ka qenë më i madh se në vitet pararendëse, gjë që tregon se abuzimet në këtë fushë po ndiqen dhe po dënohen më me rigorozitet, përcjell albinfo.ch

Në këtë drejtim, Këshilli Federal ka vendosur që në të ardhmen refugjatët, në rast të dyshimit ndaj tyre, duhet të detyrohen të japin dëshmi se nuk kanë vizituar vendin e tyre të prejardhjes.