Shoqata Humanitare “Feniksi” vazhdon të ndihmojë familjet me nevojë në Kosovë, duke ndërtuar shtëpi. Kjo Shoqatë ka ndërtuar 200 shtëpi për rastet sociale në Kosovë, përcjell albinfo.ch.
Vetëm në Komunën e Kaçanikut kanë ndërtuar 47 shtëpi. “Kryetari i Komunës së Kaçanikut, Besim Ilazi gjatë një takimi me përfaqësuesit e Shoqatës “Feniks” tha se rastet sociale edhe më tutje mbeten prioritet i Komunës së Kaçanikut, ndërsa shtoi se për secilën shtëpi të ndërtuar deri më tani komuna ka ndarë nga një shumë të caktuar të mjeteve. Kryetari përgëzoi përfaqësuesit e kësaj organizate për vullnetin e tyre për ndihmë rasteve sociale. Gjatë këtij takimi ishte i pranishëm edhe simboli i rezistencës kombëtare baca Adem Demaçi”, thuhet në njoftimin e Komunës së Kaçanikut.
Siç raporton edhe televizioni publik i Kosovës, shtëpia e fundit është ndërtuar për familjen e Naser Lutës në Ivajë të Kaçanikut. Kryefamiljare ka falënderuar shoqatën për ndihmën e jashtëzakonshme.
Milaim Jashari, kryetar i Shoqatës “Feniks”, ka thënë se është gëzim i madh që kanë ndërtuar 200 shtëpi. “Sot është një jubile i madh një gëzim i madh që kemi ardhur deri tek ndërtimi i 200 shtëpi. Kjo kënaqësi më e madhja është nga ky popull sepse ky popull na e ka mundësuar që për të ardhur deri tek familja e 200”, ka thënë ai.
Shtëpia e re në fshatin Ivajë u mundësia fal donacionit të grumbulluar nga mërgimtarët në Gjermani.
