40 mijë të huaj janë bërë zviceranë gjatë vitit 2015

Shtetasit e Kosovës janë në vendin e katërt në listën e të huajve të natyralizuar, pas portugezëve, italianëve dhe gjermanëve

Interesimi për pasaportën zvicerane në mesin e të huajve me qëndrim në Zvicër, nga viti 2008 pati filluar të shënonte rënie. Kështu, nëse në vitin rekord (2008) të drejtën e shtetësisë së Zvicrës e kishin kërkuar 44.000 të huaj, në vitin 2014 shifra kishte rënë në 32.800.

Por është interesante se sërish në vitin 2015 kemi një shtim të menjëhershëm të interesimit për pasaportën zvicerane. Kështu, numri i natyralizimeve në procerdurë të rregullt, shkruan sonntagsblick.ch. gjatë vitit në fjalë, nga 23.700 (viti 2014) është ngjitur në 31.200, që është numri më i madh pas vitit 2008, transmeton albinfo.ch.

Madje, numri i të natyralizuarve përmes procedurës së lehtësuar (bashkëshortët ose fëmijët e shtetasve zviceranë) ka shënuar një rritje rekord. Me 9400 ai është më i larti për të gjitha kohët në këtë kategori.

Shumica e kërkesave për pasaportën zvicerane vjen nga shtetasit e vendeve anëtare të BE-së. Portugezët vijnë në pozitën e parë dhe pas tyre italianët e gjermanët. Shtetasit e Kosovës janë në vendin e katërt në këtë listë, ashtu si dhe në listën e numrit të të huajve në Zvicër, në përgjithësi.

Sipas Etienne Piguet, nënkryetar i Komisionit Federal për Migracion, profesor i gjeografisë dhe ekspert i migracionit në Universitetin e Neuchetelit “Iniciativa…” e SVP-së mund të jetë një ndër faktorët që kanë shkaktuar këtë rritje të përnjëhershme. “Kjo iniciativë krijon një klimë pasigurie te të huajt, përcjell albinfo.ch. Disa vendosin të natyralizohen për të mos rezikuar të drejtën e qëndrimit.

Edhe vetë përfaqësuesit e SVP-së gjatë fushatës së tyre për iniciativën kanë theksuar se “sekondot mund të natyralizohen në rast se frikësohen se kështu do të kriminalizohen”. Nga ana tjetër për ish deputetin e SVP-së Christoph Mörgeli natyralizimi masiv i të huajve është diçka negative, “Në Zvicër, problemet me të huajt, thjesht po “natyralizoihen”, ka shkruar ai në një twitter.