62 lopë nga Tiroli nisen në Kosovë

Me këtë aksion që do të zhvillohet në Kosovë, do të mbështetet ekonomia e prodhimit të qumështit dhe të mishit atje

Landi i Tirolit, Austri, në bazë të kërkesës së bërë nga Qeveria e Kosovës, do të dërgojë në Kosovë 62 gjedhe.

Në kuadrin e programit të majmërisë “Tiroler Fleckvieh” janë grumbulluar në një stallë të zyrës për bujqësi të landit, në Rotholz 62 lopë, të cilat së bashku me një këshilltar për kultivimin e tyre nga Tiroli do të marrin rrugën për në Kosovë, shkruan tt.com.

Me këtë aksion që do të zhvillohet në Kosovë, do të mbështetet ekonomia e prodhimit të qumështit dhe të mishit atje ka thënë përgjegjësi i bujqësisë në land, Josef Geisler për mediet austriake.

“Kosovarët kanë probleme të mëdha me cilësinë e gjedheve të tyre. Lopa nga Tiroli, e racës “Tiroler Fleckvieh” në saje të kualitetit të saj të veçantë është më e përshtatshmja për të ndihmuar në ngritjen e një ekonomie funksionale të prodhimit të qumështit dhe të mishit” ka thënë Geisler.

“Kosova, si shtet i mëvetësishëm është në ngritje e sipër. Landi i Tirolit me aksionin e tij mund të japë një kontribut me shumë vlerë në bujqësinë e atjeshme. Kushtet më ë mira të jetës për njerëzit në Kosovë janë parakusht për të administruar më lehtë problemet ne mes të grupeve etnike atje”, ka shtuar më tutje Geisler.

Bujqit kosovarë do ta vlerësojnë lartë kualitetin e lopës nga Tiroli dhe do të ofrojnë një kontribut financiar për blerjen e lopëve.